Բաժանորդագրվեք Zarkerak.am-ի տելեգրամ ալիքին։
«ՀՀ յուրաքանչյուր քաղաքացու բարեկեցությունն առաջին հերթին կախված է նրանից, թե ՀՀ պետական և նաև համայնքային բյուջեններն ինչքան ծախս են անում այդ քաղաքացու բարեկեցությունն ապահովելու համար։ Հարկերը դեմոնիզացնելու ցանկացած փորձ համարում եմ ոչ միայն հակապետական, այլև քաղաքացիների բարեկեցության դեմ ուղղված գործողություն»,-Կառավարության նիստում ասաց վարչապետ Նիկոլ Փաշինյանը։
Փաշինյանի խոսքով՝ մարդիկ աշխատում, հարկեր են վճարում, այդ գործողությունների արդյունքում գումարները կուտակվում են պետական բյուջե և բաշխվում են առողջության ապահովագրությանը, կենսաթոշակների բարձրացմանը, հետվճարին, երրորդ և յուրաքանչյուր հաջորդ երեխայի աջակցության նպաստին, ուսուցիչների աշխատավարձի բարձրացմանը, զինվորականների աշխատավարձի բարձրացմանը, գիտության ֆինանսավորմանը․ «Ցանկացած բան, որը տեսնում ենք առնչվում է պետական ու համայնքային բյուջեների հետ։ Մեզնից ոչ մեկը չի կարող ինքն իր համար ճանապարհ կառուցել, իր երեխայի համար դպրոց կառուցել, իր համար ԲԿ կառուցել, անվտանգություն ապահովել և այսպես շարունակ։ Բյուջեն ոչ թե տալիս ենք ուրիշին, այլ մեր ընտանեկան ներդրումն է մեր ընդհանուր խնդիրները լուծելու համար։ Շնորհակալություն եմ հայտնում ՀՀ-ում արդյունք ստեղծող բոլոր քաղաքացիներին։
Ուզում եմ շնորհակալություն հայտնել նաև Կառավարության անդամներին։ 2017 թվականի համեմատությամբ 2025 թվականին ՀՀ-ի բյուջեի և հարկային եկամուտներն 130 տոկոսով աճ են արձանագրել, եթե հանենք այս տարիների ընթացքում մոտավորապես 29 տոկոս գնաճի ցուցանիշը, ուրեմն բյուջեն ավելի քան կրկնապատկվել է, սա համատեղ ջանքի արդյունք է»։
