Բաժանորդագրվեք Zarkerak.am-ի տելեգրամ ալիքին։
UFC-ի Փառքի սրահի անդամ Յուրայա Ֆեյբերը գնահատել է Արման Ծառուկյանի և Քոլբի Քովինգթոնի միջև հնարավոր գոտեմարտի ելքը։ Ավելի վաղ հայ մարտիկը RAF լիգայի շրջանակներում ամերիկացուն մարտահրավեր էր նետել՝ առաջարկելով մրցել ազատ ոճի ըմբշամարտի կանոններով։
Անդրադառնալով այն հարցին, թե արդյոք Արմանը կարող է հաղթել Քոլբիին զուտ ըմբշամարտի կանոններով, Ֆեյբերը կտրուկ է արտահայտվել.
«Արմանը կհաղթի՞ Քոլբիին ըմբշամարտում։ Ո՛չ, երբե՛ք: Դուք լո՞ւրջ եք հարցնում: Նա զրոյական շանսեր ունի: Ջորջիո Պուլասը վատ ըմբիշ չէ և ուժեղ տղա է. Արմանն ու Պուլասը մոտավորապես նույն մակարդակի վրա են: Բայց Քոլբին քոլեջում բարձրակարգ ըմբիշ է եղել և հանդես է եկել ավելի ծանր քաշային կարգում: Որպես ըմբիշ՝ Քովինգթոնը դեռ երիտասարդ է և շարունակում է ակտիվ մարզվել, իսկ ես արդեն 47 տարեկան եմ»։
Ֆեյբերը նշել է, որ թեև ըմբշամարտում ամեն ինչ հնարավոր է, սակայն Քովինգթոնի հարուստ փորձը թույլ կտա նրան անգամ ամենաբարդ ու անելանելի իրավիճակներում գտնել հաղթանակի ուղին:
«Չեմ վիճում, Ծառուկյանը լավն է: Նա մանկուց զբաղվում է ըմբշամարտով և սկսել է մարզվել Վրաստանում: Բայց Քոլբին շարունակում է ակտիվորեն մրցել և գորգի վրա կարողանում է ագրեսիվ գործել։ Նա մնում է էլիտար մարզիկ, իսկ ես պարզապես շաբաթական երեք անգամ ջիու-ջիթսույով եմ զբաղվում: Ծառուկյանի դեմ գոտեմարտին ընդառաջ ես չեմ ըմբշամարտել՝ վնասվածքներից խուսափելու համար: Ինձ դուր եկավ պաշտոնական մրցաշարում հանդես գալը, բայց Քոլբիի դեմ ամեն ինչ բոլորովին այլ կլինի»,- եզրափակել է վետերանը:
Ապրիլի 19-ին կայացած RAF 08 մրցաշարում Արման Ծառուկյանը մրցել էր հենց Յուրայա Ֆեյբերի հետ և ժամանակից շուտ՝ 13-1 հաշվով, վստահ հաղթանակ տարել:
