Բաժանորդագրվեք Zarkerak.am-ի տելեգրամ ալիքին։
Ելույթ եմ ունեցել Պետերբուրգյան միջազգային իրավաբանական 14-րդ համաժողովում՝ «Արդարադատության համակարգի բարեփոխումը գլոբալ մարտահրավերների պայմաններում. Հայաստանի Հանրապետության փորձը» խորագրի ներքո: Այս մասին հայտնել է արդարադատության նախարար Սրբուհի Գալյանը։
«Անդրադարձել եմ խորհրդարանական ընտրությունների արդյունքներին` նշելով, որ խորհրդարանական ընտրությունները վերահաստատել են երկրի հավատարմությունը ժողովրդավարական արժեքներին և սահմանադրական գործընթացներին։
Ներկայացրել եմ մեր արդարադատության համակարգում իրականացվող բարեփոխումները և ոլորտի զարգացման առաջնահերթությունները.
-Մինչև 2 մլն դրամի բռնագանձման պահանջներով գործերի քննությունը պատվիրակվել է նոտարներին, արդյունքում՝ դատարանների ծանրաբեռնվածությունը կրճատվել է։
-Քաղաքացիական և վարչական գործերի քննության համար սահմանվել են ողջամիտ ժամկետներ։
Կարևորել եմ վեճերի լուծման այլընտրանքային մեխանիզմների զարգացումը, մասնավորապես՝
-Ներդրվել է արբիտրաժի և հաշտարարության ինստիտուտը։
-Պարտադիր հաշտարարության ներդրումը նպաստել է դատարաններ մուտք գործող ընտանեկան գործերի թվի զգալի նվազմանը։
Ներկայացրել եմ արդարադատության համակարգի թվայնացման ուղղությամբ իրականացվող աշխատանքները՝ ներառյալ
-էլեկտրոնային դատավարության համակարգերի ներդրումը,
-իրավական տեղեկատվական համակարգերի արդիականացումը,
-թվային ծառայությունների զարգացումն ու նոր էլեկտրոնային բիզնես ռեեստրի գործարկումը։
Խոսել եմ նաև կոռուպցիայի դեմ պայքարի ոլորտում իրականացվող բարեփոխումների մասին՝
-ներդվել է կոռուպցիոն ռիսկերի գնահատման նոր մեխանիզմ,
-խստացվել են պաշտոնատար անձանց ներկայացվող բարեվարքության պահանջները,
-ներկայացվել է այլընտրանքային խափանման միջոցների և պատժատեսակների կիրառման փորձը, այդ թվում՝ տնային կալանքը և վարչական հսկողությունը։
Ելույթիս ավարտին նշել եմ, որ արդարադատության համակարգի արդյունավետ բարեփոխումը հնարավոր է ինստիտուցիոնալ փոփոխությունների, թվային լուծումների և միջազգային համագործակցության համադրման միջոցով՝ կարևորելով փորձի փոխանակման և մասնագիտական երկխոսության շարունակական զարգացումը»,-նշել է նա։
