Բաժանորդագրվեք Zarkerak.am-ի տելեգրամ ալիքին։
Կրասնոդարի երկրամասի ղեկավար Վենիամին Կոնդրատևի խոսքով՝ օգոստոսի 24-ի գիշերը Կրասնոդարում ուկրաինական անօդաչու թռչող սարքի հարձակման հետևանքով զոհվել է երկու երեխա։
Նրա խոսքով՝ «անօդաչու թռչող սարքի բեկորները» ընկել են մասնավոր մանկական կենտրոնի վրա։ Վիրավորվել են ևս յոթ երեխա և երկու մեծահասակ։ Հարձակման հետևանքով հրդեհվել են նաև պահեստներ։
Բացի այդ՝ ուկրաինական անօդաչու թռչող սարքերի հարվածներից տուժել է Ստավրոպոլի երկրամասի տարբեր շրջաններում գտնվող երեք «Օզոն» պահեստ, հաղորդում է առցանց շուկայի մամուլի ծառայությունը։
Ադիգեյսկում և Նևինոմիսկում զոհեր չկան, ներսում գտնվող օբյեկտներն ու ապրանքները չեն տուժել, սակայն պահեստները փակ են։
Մախաչկալայում մի քանի մարդ վիրավորվել է և ստացել բժշկական օգնություն։ Այնտեղ հրդեհ է բռնկվել, պահեստը չի ընդունում առաքումներ, և այնտեղից ապրանքները անհասանելի կլինեն։
Ադիգեյի նահանգապետ Մուրատ Կումպիլովը հայտնել է, որ հարձակման հետևանքով հրդեհ է բռնկվել Տախտամուկայսկի շրջանի Օզոնի լոգիստիկ կենտրոնում։
Ստավրոպոլի երկրամասում իշխանությունները հայտարարել են, որ հակաօդային պաշտպանությունը «հետ է մղում» Նևինոմիսկի արդյունաբերական գոտին թիրախավորող ուկրաինական անօդաչու թռչող սարքերի հարձակումը։ Նահանգապետ Վլադիմիր Վլադիմիրովը որևէ հետևանքների մասին չի հայտնել։
