Բաժանորդագրվեք Zarkerak.am-ի տելեգրամ ալիքին։
ՄԱԿ-ում ՀՀ մշտական ներկայացուցիչ Պարույր Հովհաննիսյանը որպես բանախոս մասնակցել է Քաղաքակրթությունների միջև երկխոսության միջազգային օրվան նվիրված բարձրաստիճան միջոցառմանը՝ միտված համանուն միջազգային օր հաստատելու վերաբերյալ Գլխավոր Ասամբլեայի 78/286 բանաձևի արդունավետ իրականացման շուրջ մտքերի փոխանակմանը: Այս մասին հայտնում է ՄԱԿ-ում ՀՀ մշտական ներկայացուցչությունը։
Դեսպան Հովհաննիսյանն ընդգծել է բոլոր քաղաքակրթությունների և մշակույթների ներդրումը համամարդկային ժառանգությանը` կարևորելով բազմազանության ընկալումը որպես փոխըմբռնման, համերաշխության, ներառականության, համատեղ առաջընթացի և միջազգային համագործակցության հիմք, որը երբեք գործիք չետք է դառնա բաժանումների ու հակամարտությունների համար:
Այս համատեքստում դեսպան Հովհաննիսյանը կարևորել է Հայաստանի նախաձեռնությամբ վերջերս ընդունված ՄԱԿ-ի Գլխավոր ասամբլեայի «Կրթություն հանուն խաղաղության» բանաձևը, որը վերահաստատում է կրթության դերը որպես խաղաղության հիմնասյուն։ Նա նաև ընդգծել է Հնագույն քաղաքակրթությունների ֆորումի Երևանի հռչակագրի նշանակությունը՝ մշակութային ժառանգության պահպանության և խաղաղության մշակույթի առաջխաղացման հարցում։
