Անշարժ գույքի շուկայում ոչ գներն իջան, ոչ պահանջարկը նվազեց. ինչ եղավ 2025-ին և ինչ սպասել 2026-ին. մասնագետի դիտարկումները

Բաժանորդագրվեք Zarkerak.am-ի  տելեգրամ ալիքին։

«2025-ի ընթացքում անշարժ գույքի  շուկան ընդհանուր առմամբ ստաբիլ է եղել: Եթե ինչ-որ լուրջ իրադարձություններ չլինեն 2026-ին էլ կանխատեսվում է, որ  անշարժ գույքի շուկայում շուրջ տատանումներ չեն լինի՝ գների նվազման կամ բարձրացման համատեքստում»,- Zarkerak.am-ի հետ այս մասին ասաց անշարժ գույքի գործակալությունների ասոցիացիայի խորհրդի անդամ Անդրանիկ Հարությունովը՝ անդրադառնալով անշարժ գույքի շուկայի իրավիճակին 2025-ի ընթացքում:

Վիճակագրական կոմիտեի ներկայացրած ամենաթարմ տվյալները վերաբերում են հոկտեմբեր ամսին անշարժ գույքի շուկայի ցուցանիշներին: Համաձայն դրանց, առքուվաճառքի գործարքները կազմել են 6206, իսկ 2024-ի հոկտեմբերին՝ 5333: Ընդհանուր գործարքների ցուցանիշները 2024-ի նույն ամսվա նկատմամբ ներկայացված են այս բերված աղյուսակում: 

2025-ին անշարժ շուկայի իրավիճակը Անդրանիկ Հարությունովը համեմատեց 2022-ի հետ, երբ շուկան՝ մասնավորապեն առաջնային, շատ ակտիվ էր՝ նաև եկամտահարկի հետվերադարձի ծրագրի ֆոնին.«Տարին սկսվեց բազմաթիվ վատ կանխատեսումներով՝ հատկապես մայրաքաղաքում եկամտահարկի հետվերադարձի չեղարկմամբ պայմանավորված: Բայց գործարքների քանակը չի նվազել, անշարժ գույքի շուկան միշտ եղել է ակտուալ, և ֆինանսական ներդրումների համար ամենահուսալիներից մեկն է համարվում: Չմոռանանք, որ ուրբանիզացիայի պայմաններում մեծ հոսք կա մարզերից Երևան»: 

«Առաջնային շուկայի վերաբերյալ կարծիք կար, որ սպառման ծավալների անկման, պահանջարկի պակասի հետևանքով տրված շատ շինթույլտվությունների ֆոնին վաճառքներ ապահովելու համար կառուցապատողները կիջեցնեն բնակարանների գները: Ես վստահեցնում եմ, նման խնդիր չկա և ոչ մի գին էլ չի ընկնելու: Կառուցապատողների համար վաճառքները, նորմալ, ստաբիլ են»:

Անդրանիկ Հարությունովն ընդգծեց՝ ՀՀ-ն կարիք ունի նոր բնակֆոնդի, նորակառույցները պահանջված են.«Բնակֆոնդի մեծ մասը հետխորհրդային են, տարիներ շարունակ չեն սպասարկվել և նրանց ենթակառուցվածքները 21-րդ դարի մարդու կարիքների հետ սկսում են չհամընկնել և մարդիկ նախընտրում են նոր շենքերում բնակարաններ ձեռք բերել: Թեև Երևանում առաջնային շուկայում եկամտահարկի հետվերադարձի ծրագիրը դուրս եկավ, բայց դրա փոխարեն կառուցապատողները տրանսֆորմացիայի ենթարկեցին վաճառքները՝ առաջարկելով տարաժամկետ վճարման տարբերակ, այլ մեխանիզմներ և դա աշխատեց»: 

Առաջնային շուկայում բնակարանների գների վերաբերյալ ևս Վիճակագրական կոմիտեն ներկայացրել է տվյալներ՝ համեմատելով դրանք 2024-ի հոկտեմբերի հետ: 

Ինչ վերաբերում է վարձակալության շուկային, Հարությունովն ասաց, որ այստեղ գները դարձել են նորմալ, մարդկային. «Պահանջարկը ստաբիլացել է՝  ի տարբերություն  կրիտիկական ժամանակների՝ ռուս-ուկրաինական պատերազի հետևանքով Հայաստան եկողների մեծ թվի, արցախահայերի բռնի տեղահանման: Այս պահի դրությամբ ունենք նորմայի մեջ պահանջարկ, երբ ասում էին անշարժ գույքի վարձակալության գներն ահավոր իջել են՝ դա էլ ինչ-որ պահի իրավիճակով պայմանավորված է եղել»,- ասաց Հարությունովն ու հավելեց, որ վարձակալության շուկան կարող է կտրուկ փոխվել այլ անսովոր իրավիճակների ի հայտ գալու պարագայում: 

Այն, որ վարձով բնակարան տվողները պետք է հայտարարագիր ներկայացնեն ՊԵԿ-ում և վարձավճարի տասը տոկոսի չափով հարկ վճարեն, մասնագետի համոզմամբ 2025-ի ընթացքում առանձնապես չի ազդել շուկայում գների ձևավորման վրա: Նա հորդորեց անպայման կնքել վարձակալության պայմանագիր՝ սեփական իրավունքները պաշտպանելու և խնդիրներից խուսափելու համար: 

Ինչ վերաբերում է անշարժ գույքի նկատմամբ մարզերում առկա պահանջարկին, Անդրանիկ Հարությունովը նշեց, որ բացի երևանամերձ մարզերից պահանջարկ կա նաև Դիլիջանում, Ծաղկաձորում՝ առավելապես ներդրումային նպատակներից ելնելով. «Սակայն մարզերում կա ենթակառուցվածքների մեծ խնդիր՝ կոյուղատար,  ջրամատակարարում, որով եթե պիտի զբաղվի կառուցապատողը, դա կառուցապատման ինքնարժեքի չափ գումար է ստացվում:  Այն տարածքներում որտեղ կան ենթակառուցվածքներ, կամ պետությունն աջակցում է այդ հարցում կառուցապատողներն ավելի ակտիվ ծավալներով են աշխատում»: 

Մարիամ Մկրտչյան