Բաժանորդագրվեք Zarkerak.am-ի տելեգրամ ալիքին։
Հայաստանում Ռուսաստանի քաղաքացիների ակտիվությունը Պետական դումայի ընտրություններում բարձր է։ Այս մասին այսօր լրագրողների հետ զրույցում ասել է Հայաստանում Ռուսաստանի դեսպան Սերգեյ Կոպիրկինը:
Նրա խոսքով՝ տեղական ժամանակով ժամը 15:00-ի դրությամբ երկու ընտրատեղամասերում՝ Երևանի Ռուսաստանի դեսպանատանը և Գյումրիի գլխավոր հյուպատոսությունում, քվեարկել է 1808 մարդ։
«Ընտրողների հոսքը բավականին մեծ է։ Մարդիկ ակտիվորեն գալիս են»,- քվեարկության օրը լրագրողներին ասել է Կոպիրկինը։
Նա հավելել է, որ բարձր հետաքրքրվածությունը պայմանավորված է նրանով, որ Պետդումայի ընտրությունները «շատ կարևոր իրադարձություն են երկրի և նրա քաղաքացիների կյանքում»։ Նա նշել է, որ Հայաստանում բնակվում և ժամանակավորապես գտնվում է Ռուսաստանի քաղաքացիների զգալի թիվ, որոնք ցանկանում են արտահայտել իրենց դիրքորոշումը։
«Մենք մեր պատմության շատ պատասխանատու, ոչ հեշտ փուլն ենք ապրում։ Եվ այս համատեքստում ընտրությունները, անշուշտ, ունեն առանձնահատուկ նշանակություն և յուրահատուկ իմաստ»,-ասել է Կոպիրկինը։
Դեսպանը նաև հայտնել է, որ Ռուսաստանի դեսպանատունը և Գյումրիի գլխավոր հյուպատոսությունը կազմակերպել են քվեարկություն Հայաստանում բնակվող կամ գտնվող Ռուսաստանի քաղաքացիների համար։ Ձեռնարկվել են անհրաժեշտ միջոցներ՝ ընտրությունները Ռուսաստանի օրենսդրությանը համապատասխան անցկացնելու, ինչպես նաև անվտանգությունն ու կարգն ապահովելու համար։
«Այս պահին պետք է արձանագրեմ, որ, ընդհանուր առմամբ, որևէ արտակարգ իրավիճակ չի եղել։ Հուսանք, որ դրանք նաև չեն առաջանա»,-նշել է նա:
Կոպիրկինը նաև շնորհակալություն է հայտնել հայկական կողմին Ռուսաստանի դեսպանատան շրջակայքում անվտանգության ապահովման համար՝ նշելով, որ անվտանգության միջոցառումները հատկապես նկատելի են ընտրողների մեծ հոսքի ֆոնին։
Երևանում Ռուսաստանի դեսպանատանը և Գյումրիի գլխավոր հյուպատոսությունում գործող ընտրատեղամասերը պետք է աշխատեն մինչև տեղական ժամանակով ժամը 20:00-ը։ Պատասխանելով 2021 թվականի ընտրությունների համեմատ մասնակցության վերաբերյալ հարցին՝ Կոպիրկինը ենթադրել է, որ այն ավելի բարձր կլինի։
«Կարծում եմ՝ ավելի բարձր կլինի։ Դե ինչ, սպասենք քվեարկության ավարտին»,- ասել է դեսպանը։
Կոպիրկինը նաև հայտարարել է, որ ձայների հաշվարկը և քվեարկության արդյունքների փոխանցումը կանցկացվեն սահմանված ընթացակարգին համապատասխան։ Նա տեղեկացրել է, որ ընտրատեղամասերում ներկա են դիտորդներ։
«Այն ամենը, ինչ անհրաժեշտ է օրենսդրությանը համապատասխան, կկատարվի։ Երաշխավորում եմ, որ դա կլինի ազնիվ, թափանցիկ հաշվարկ»,-ասել է դեսպանը:
