Բաժանորդագրվեք Zarkerak.am-ի տելեգրամ ալիքին։
«Հակաօդային պաշտպանությունը 100 տոկոսով չի աշխատում, պայթյուններ լինում են, վերջին մեկ ժամվա մեջ երեք անգամ ազդանշան է միացել, բայց գիշերը հանգիստ էր»,- Zarkerak.am-ի հետ զրույցում այս մասին ասաց մեր հայրենակցուհին Իսրայելի Կիրյաթ Գաթ քաղաքից՝ անդրադառնալով Իրանի և Իսրայելի միջև սկսած բախումների հետևանքով իրենց քաղաքում տիրող իրավիճակին:
Նրա խոսքով, քաղաքում բավականին շատ հայեր կան.«Իմ շրջապատում տուժածներ, զոհեր չկան, կարծում եմ նման բան եթե լիներ շուտ կիմանայինք: Մեզ մոտ իրավիճակն այսօր նույնն է, ինչ նախկին օրերին: Հարավում համեմատաբար ավելի հանգիստ է»:
Մեր հայրենակցուհին նշեց, որ այս բախման հետևամնքով մեծ խուճապ չի նկատում, կարծես տեղի բնակչությունը այս իրավիճակին սովոր լինի.«Կարծես ավելի սովորական է դարձել, առաջին անգամը չէ, մի քիչ ավելի հանգիստ են»:
Նա պատմեց, որ ինչպես ամեն տեղ, իրենց մոտ էլ դպրոցները, մանկապարտեզները փակ են:
Արդյոք այս իրավիճակում կան հայեր, որոնք ցանկանում են վերադառնալ Հայաստան.«Օդը փակ է, կարծում եմ՝ մոտակա 2-3 շաբաթն այդպես կմնա, հետևաբար նման պլաններ չեն կազմում, բայց կարծում եմ, եթե լինի էվակուացիա, Հայաստան գալ ցանկացողների մեկ ինքնաթիռ կհավաքվի»:
